Azkarraga Etxegibel, Joseba

Joseba Azkarraga Etxegibel

1972an jaioa, Bizkaiko Abadiño herrian, Anbotoko haitzen magalean. Luzaroan trikitilari gisa ibilitakoa da euskal herri eta auzuneetan.
Egun Durangon bizi da eta Soziologia irakasten du HUHEZIn (Mondragon Unibertsitateak Eskoriatzan duen Humanitate eta Hezkuntza Zientzien Fakultatean).
Ikerkuntzan ere badihardu, MUren baitan kokatzen den LANKI Ikertegian (www.lanki.coop). Arrasateko mugimendu kooperatibista dute ikergai nagusi, eta gizarte zibil autoeratuagoa oinarrizko intuizio, motibazio eta ipar.
Diruak behar luke bihotzik bere lehen saiakera lana izan zen, eta bere doktore tesiaren zati bat. Gerora etorri ziren beste bi lan: Mendebaldearen mintzo mindua. Begiratu kritikoa gizarte eta kultura modernoari, Euskaltzaindiak banatzen duen Mikel Zarate saiakera saria jaso zuen; eta Nor bere patroi. Arrasateko kooperatibistak aro globalaren aurrean, Eusko Jaurlaritzak esleitzen duen Euskal Gizartearen Egoera ikerketa sariaren irabazlea.
Egunkarian aritu zen iritzi artikuluak idazten, eta gaur egun Berria-n eta Argia-n jarraitzen du langintza horretan.