Liburu Gaztea saria «Pol eta Val» nobelarentzat

azala

Liburu Gaztea eta Idazle Gaztea sariak banatu dira. Gehien bozkatutako liburuetako bat cren Pol eta Val izan da Idazle Gaztean gailendutakoak Andoain, Irun, Bergara eta Oiartzungoak dira.

DV. Gipuzkoako Bigarren Hezkuntzako ikasleek aukeratu dituzte aurten ere bere liburu kuttunak. 35 ikastetxek hartu dute parte Liburu Gaztea ekimenean eta hauek gertatu dira libururik bozkatuenak: Manuel L. Alonsoren Hegoaldera (DBH 1); Luis Sepulvedaren Kaio baten historia eta hegan egiten irakatsi zion katuarena (DBH 2); Josetxo Oruetaren Pol eta Val (DBH 3); John Boyneren Pijama marradunaz jantzitako mutikoa (DBH 4).

Gipuzkoako Foru Aldundiak eta Galztagorri elkarteak antolatutako ekimena da hau. Ez da ohiko sariketa, honetan azken hitza ez baitaukate helduek, Derrigorrezko Bigarren Hezkuntzako gazteek baizik.

Galtzagorri elkarteak izendatutako batzorde batek 12 liburu aukeratzen ditu, gazteek irakur ditzaten, DBHko maila bakoitzarentzako hiru. Ikastetxe guztiei, 123ri hain zuzen ere, egin zaie parte hartzeko gonbitea, eta horietatik 35ek eman baiezkoa. Guztira 3.395 ikaslek eman dute gero botoa.

Idazle Gaztea
Bestalde, Idazle Gaztea izeneko lehiaketa ere izaten da, non Derrigorrezko Bigarren Hezkuntzako
ikasleek parte hartzen duten beren narrazio eta olerkiekin. Gai edo esaldi jakin batzuk proposatzen zaizkie ikasleei, derrigorrez euren lanetan azaldu behar dutenak.

Beste lehiaketa honek bi sail ditu: narrazio laburrak eta poesia; eta sail bakoitzak gainera, bi kategoria: A kategoria, DBHko lehenengo zikloko ikasleentzat eta B kategoria, bigarren ziklokoen-tzat. Guztira, 88 lan aurkeztu dira.

Jasotako lan guztien artean hautapen batzordeak hiru lan irabazleak aukeratu ditu. Hauexek dira irabazleak narrazioaren arloan: A kategorian, Mikel de Alba Ruiz (Toki Alai ikastetxea, Irun); B kategorian, Uxue Agirre (Aranzadi ikastola, Bergara).

Poesiaren alorrean, berriz, lagun hauenak izan dira lanik onenak: A kategorian, Leire Ganzarain (La Salle Berrozpe ikastetxea, Andoain); B kategorian, Lierni Tello (Haurtzaro ikastola, Oiartzun).
Lehenengo saria jaso duten idazle gazteek Andaluziara joateko aukera izango dute; eta bigarren eta hirugarren saria jaso dutenek, berriz, liburu bono bana.

Ikastetxe parte hartzaile guztien artean berriz, Andaluziarako bidaia baten zozketa egin da eta Donostiako Mariaren Bihotzari egokitu zaio.

FELIX IBARGUTXI

Diario Vasco

This entry was posted in Pamiela etxea. Bookmark the permalink.