Euskaldunak eta ondasunak

Esku artean duzun liburu honetan euskaldunek ohituraz ondasunekiko izan dituzten harremanen berrit ematen da; zehatzago esateko, harreman hauek gidatu dituen gizarte filosofia aurkezten da. Hain zuzen ere, euskaldunek baliotsuak eta urriak izan diren gauzekiko –etxea, etxe-abereak eta elikagaiak, berezik– harremanak antolatzeko izan dituzten ohitura, araudi eta ikuspuntuak hobeki ezagutu eta ulertzeko asmoarekin.

Orrialde hauetan egiten den ekarri garrantzitsuena da gai honi buruzko ezagutza handitzeko bide berri bat jorratzen dela. Hau da, euskaldunen ondasunekiko harremanak aztertu dituzten autoreen artean desadostasun eta kontraesanak nabarmentzen direla ikusi ondoren, hizkuntzan oinarritutako ikerketa burutu du Patxi Juaristik lan honetan. Aurkezten diren ondorioak, honenbestez, hizkuntzaren azterketan, zehazki euskal esaera zaharren azterketan oinarritzen dira. Euskal esaera edo lokuzioak, izan ere, denboraren joan-etorriaren gainetik gorde diren hitz egiteko ereak dira. Hizkuntzaren bihotzean bizi eta herriak erabiltzen dituen adierazpideak izanik, iraganeko bizimodu, xede eta pentsamoldeak aztertzeko material ezin hobetzat jo daitezke. Zentzu honetan, ondasunekiko harremani dagokionez iraganean izandako pentsaera eta ikuspuntuak ezagutu eta ulertzeko oinarri ezinhobeak dira liburu honetan irakurleak ikus ahal izango duen bezala.