Erdozia, Jose Luis

Jose Luis Erdozia Mauleon (Etxarri Aranatz, 1956)

Unibertsitate-ikasketak burutu zituen EHUn: Geografia eta Historiako lizentzia (1981); Pedagogi-gaitasun agiria (PEI-CAP, 1982); Ikastetxeen antolamendua, kudeaketa eta zuzendaritza graduondoa (1992); eta, azkenik, Euskal Filologiako doktoregoa (2000). Irakaskuntza ertainetako irakasle lanbidean jardun du 35 urtez.

Bestalde, euskaltzain urgazle izendatu zuten 2006an eta urte bat lehenagotik da Euskaltzaindiko Euskalkien Lantaldeko kidea.

Aldizkari espezializatuetan (FLV, Euskera, ASJU, Principe de Viana, Cuadernos de Etnología y Etnografía) hogeita bost artikulu karrikaratu ditu eta sei liburu argitaratu dagoeneko, azken hauek guztiak Sakanako euskara eta toponimiari buruzkoak: Sakana erdialdeko euskara. (2001, Doktore tesia), Sakanako hiztegi dialektologikoa. (2004), Sakana erdialdeko bitxikeriak: esaerak eta beste. (2004), Altsasuko euskara. (2006), Sakanako hizkeren araberako idazkera batua. (2007), Etxarri Aranazko leku-izenak herrigune historikotik kanpo. Egungo toponimia ofiziala (2019).