Filipinetan bizi den idazlearen kontuak

Ipuin hauek oso urruti idatziak dira, munduko beste aldean kasik, Filipinetan. Hango hiri batean, Cavite deiturikoan, jaio zen testu hauen idazlea. Aiton-amonak euskaldunak izan zituen, baina narratzaileak ez du inoiz aukerarik izan Euskal Herrira etorri eta arbasoen jaioterria ezagutzeko. Filipinetan dagoen Negros irla apartatuan bizi izanda ere idazle honek beti egin du amets inoiz ezagutu ez duen Euskal Herriarekin. Aspalditik aritu da idazle hau istorio eta kontuak han eta hemen biltzen. Eta hala utzi du idatzita hainbeste paperen artean: hemen datozen ipuin hauek paperera neronek pasatuak dira. Batzuk aitonari aspaldi entzundako istorioak dira, ni txikia nintzenean eta palmondoen itzalpean eserita geundela. Orain paperera pasatzerakoan aitonak esandakoa ezin izan dudanean zuzen gogoratu neuk, zerbait erantsiz edota asmatuz, moldatu dut ahal izan dudan gisan. Zoritxarrez ez dut inor aldamenean hura ez zela hala izan esateko. Beste zenbaitzuk, gure aitaren garaikoak dira: negozioak zirela eta askotan iristen zen etxera lagun eta ezagun euskaldun askorekin; gurean geratzen ziren haiek denboralditxoa ematera. Haietatik batzuk gero indiano modura bizi izan ziren beren jaioterrietara itzulita. Eta badaude, baita ere, gutxi batzuk neuk, nola edo hala, asmatu ditudanak. Ipuin guztiek dute zerikusiren bat Euskal Herriarekin: batzuetan pertsonaiak izango dira euskaldunak, bestetan lekuak berak edota giroak izango du nolabaiteko lotura gure arbasoen jaioterriarekin. Zenbaitetan istorioak izanen du parekotasuna nahiz eta hasiera batean ez oso garbi azaldu antzekotasun hori… Orain, euskal editore bati esker, badirudi kontu hauek argitara aterako dituztela, non-eta Euskal Herrian bertan, hemendik hain urruti, eta han zehar barreiaturik zabalduko direla, ene seme galdu eta ahaztuak bailiran, nonahi eta batek jakin noiz arte. Askiesten dut horrekin.