Auto-stopean

«Auto-stopean» istorio ausarta da eta, hain juxtu ere, auto baten barruan gertatzen dira humorez eta egoera barregarriz beteriko egoera guztiak, aldian-aldian sartzen diren bidaiari berezi-bereziak ere tarteko direla. Surf-taula aldean duela, hondartzara joateko prestatzen ari den surflari bat aurkezten digu testu errimatuak. Hirian barrena ibilbidean aurrera egiten duen heinean askotariko pertsonaiak hartuko ditu (edo ez) autoan, nor baino nor bitxiagoa: urpekaria, superheroia, kaimana… eta ipuinetako pertsonaiaren bat edo beste ere irtengo zaio bidera. Eta bidaiari bakoitzak bere tramankuluak ez ezik, berezkoa duen ezaugarriren baten ekarpena ere egingo du; denak ala denak ere, gidari prestuak biziko dituen emozioen zaldiko-maldikoaren parte izango dira, bere autoa bidaiariz eta tramankuluz betetzen den bitartean. Kontakizun kateatua da Guilherme Karsten-en obra honen emaitza; alde batetik, erritmo eta zolitasun handia ditu eta, bestalde, bukaera harrigarri eta irekiarekin amaitzen den planteamendu zirkularra du. Modu linealean garatzen den proposamen grafikoa eszenen eta kontraste kromatikoengatik nabarmentzen da, hori guztia alai eta ausarta den hiri-giroan gertatzen delarik.