DBH-n, Amaia Sanchez izan da garaile
Iturmendiko Arrano Beltza ikastetxeko Aaron Arbizu Alberto izan da aurten Pamiela eta Euskara Kultur Elkargoak antolatzen duten Mikro-ipuin Lehiaketako garailea, Koilara hiltzailea izenpean aurkeztutako lanarekin. Bigarren Hezkuntzari dagokionez, Atarrabiako Paz de Ziganda ikastolako Amaia Sanchezek idatzitako Poltsikoetan suertatu da txapeldun.
Aingeru Epaltzak (idazlea) Inma Erreak (idazle eta itzultzailea) Angel Errok (idazlea) eta Toño Murok (irakasle eta ikertzailea) osatutako epaimahaiaren iritziz, Arbizuren lanean "erakutsitako fantasia eta umorea, istorioa oso lerro gutxitan garatzeko manera eta haren barne-garapenaren koherentzia" aintzat hartu dute, "bai eta gauzak kontatzeko orduan irudiak baliatzeko trebezia ere". Sanchezen mikro-ipunean, berriz, "erritmoa, hizkuntzaren erabilera minimalista, irudien sekuentziazioa eta transgresio batean txirikordatzen diren ekintza, pentsamendu, sentipen eta emozio kontraesankorren kateatze laburra bezain zehatza" baloratu dute.
{morfeo 15}
Lehenengo Hezkuntzan, irabazleaz aparte, epaimahaiak hiru ipuin finalista ere hautatu ditu: Arantzako Ikastetxe Publikoko Ohiana Amorós Abregoren Harri kozkorra, Berako Labiaga Ikastolako Mikel Castilloren Erlojuan, eta Lesakako Tantirumairu Ikastolako Paulo Ramos Zumalderem Dibertibasura lanak. Bigarren Hezkuntzari dagokionez, finalistak Berako Toki Ona Institutuko Nahia Mitxelena Vaqueroren Ondo lo egin, Berriozarko Institutuko Irantzu Garzaronen Ane gaixoa eta Iruñeko San Fermin Ikastolako Bidane Leon Balentziaren Kolpeen mina bihotzean izan dira.
Pamielak, sarituak izan diren zortzi ipuin hauek, epaimahaiak erabakitako lan aipagarrienekin eta Asisko Urmeneta idazleak egindako mikro-ipuin batekin batera, "mikro-liburu" batean argitaratuko ditu. Liburua Iruñeko liburu azokan aurkeztuko da ekainean.
Lehiaketaren ibilbidea Aurtengoa, Mikro-ipuin Lehiaketaren bosgarren edizioa izan da. Nafarroako ikastola eta ikastetxetako Lehen Hezkuntza eta Derrigorrezko Bigarren Hezkuntza euskaraz egiten duten edo euskara ikasten duten ikasleek parte hartu dute bertan. Aurten, lehiaketaren bosgarren edizioa izan den honetan, 1.675 lan bildu dituzte antolatzaileek, aurreko edizioetan lortutako mikro-ipuinen kopurua gaindituz. Guzti horietatik, 721 Lehen Hezkuntzakoak izan dira eta 954 Derrigorrezko Bigarren Hezkuntzakoak.
Antolatzaileek adierazi dutenez, Nafarroako zonalde guztietako ikastetxeek parte hartu dute lehiaketaren edizio honetan: zonalde euskalduneko 20, zonalde mistoko 22 eta eremu ez euskalduneko 8. Azken datu honek berrikuntzak dakartza, izan ere, lehen aldiz parte hartzea erabaki duten bost ikastetxetatik lauk A eredua soilik eskaintzen baitute (eradarazko irakaskuntza, eusklarako asignaturarekin).
Aurretik Mikro-ipuin Lehiaketaren lau edizio ospatu izan dira, 2006, 2007, 2008 eta 2009koa. Parte hartzaile kopuruak, lehiaketak aurrera egin ahala, gora jo du.
2006an, antolatzaileek 110 lan jaso zituzten, batez ere Iruñeko zonaldeko ikastetxeetatik. Urte hartan, Lehen Hezkuntza, Bigarren Hezkuntza eta Batxilergokoek ere parte hartu zuten.
Lehiaketaren bigarren urtean, 2007an, kopurua zertxobait igo bazen ere, 2008ko Mikro-ipuinen III. Lehiaketan nabariagoa izan zen aldea, bertan 1033 ipuin aurkeztu baitziren.
Joan den urteko edizioan, zenbakiek beherakada jasan bazuten ere (645 lan aurkeztu ziren), aurtengoan marka berria lortu da, aurkeztutako 1675 lanekin. 2009 urte horretan Malen Barriola Eskubi suertatu zen garaile, Hodei txikiaren ipuin zentzugabea ipuinarekin.
Miren Mindegia. Diario de Noticias. (2011-III-3)
[issuu layout=http%3A%2F%2Fskin.issuu.com%2Fv%2Fcolor%2Flayout.xml backgroundcolor=FFFFFF showflipbtn=true documentid=110330062326-8311b875bec947bfbe74de85f200cd36 docname=mikro-ipuin username=Pamiela loadinginfotext=Hitz%20gutxitan showhtmllink=true tag=aaron-arbizu width=300 height=207 unit=px]
