Euskara Kultur Elkargoak eta Pamiela Etxeak «Mikro-Ipuin Lehiaketa»ren seigarren edizioaren deialdia iragartzen dute. Lehiaketa hau Nafarroa osoko ikastetxeetan euskaraz ikasten duten ikasleei zuzendurik dago. Aurten, estreinakoz, A ereduko euskara irakasgaitzat duten ikasleei zuzendutako arlo berezia antolatzen da.
ARAUAK
1. Lehiaketa honetan, A zein D ereduko Lehen Hezkuntzan eta Derrigorrezko Bigarren Hezkuntzan ari diren ikasleek parte har dezakete.
2. Idazlanak euskaraz idatzitako ipuinak izan behar dira.
3. Ipuinak jatorrizkoak, argitaragabeak eta aurreko edozein lehiaketatan saritu gabeak izango dira, baita beste inongo lehiaketatan aurkeztu gabeak ere.
4. Ipuin bakoitzak gehienez 100 hitz izango ditu.
5. Irakasleak talde bakoitzeko lanak bilduz, EKEren egoitzara-Zapateria kalea 50, 1. 31015 IRUÑEA- aurkeztu edo postaz bidaliko ditu; bestela, posta elektronikoaren bidez, mikroipuinak@euskarakultur.org helbidera.
6. Lehiaketan aurkeztutako lanak deialdi honetako arauei lotu beharko dira.
LANEN AURKEZPENA: POSTA ARRUNTAZ BIDALTZEKO
Lanetan ezin dira egileen datu pertsonalak agertu. Lanak goitizenaz sinatu beharko dira eta egile bakoitzaren datuak gutunazal itxi batean aurkeztuko dira horretarako prestatu dugun eredua erabiliz (fotokopiatu eredua arauetatik). Beraz, mikro-ipuin bakoitzeko, gutunazal txiki bat egongo da. Lan guztiak, beren gutunazal txikiekin batera, beste gutunazal handi batean sartuko dira. Gutunazal handia helbide honetara bidali behar da: EKE – Zapateria kalea, 50 – 1 C. 31001 Iruña.
LANEN AURKEZPENA: POSTA ELEKTRONIKOZ BIDALTZEKO
mikroipuinak@euskarakultur.org helbidera atxikitutako bi dokumentu bidali behar dira. Lehenengo dokumentuan mikro-ipuinak egongo dira, bakoitza bere goitizenaz sinatuta. Bigarren dokumentuan, egileen datuak bilduko dira: Ikaslearen goitizena, izen-abizenak, maila, adina eta eredua. Era berean, mezuan zehaztuko dira ikastetxearen datuak: ikastetxearen izena, helbide postala, helbide elektronikoa eta irakasle arduradunaren izena baita helbide elektronikoa ere.
7. Idazlanak onartzeko epea 2011ko azaroaren 30ean amaituko da.
8. Euskara Kultur Elkargoak izendatuko du adituen epaimahaia erakunde horretako kideen eta literatura munduko pertsonen artean; epaimahaiak, edonola ere, ez du ez egileen izenik ez izengoitirik ezagutuko.
9. Epaimahaiaren epaia apelaezina izango da eta 2012ko urtarrilaren 30ean ezagutaraziko da.
10. Oinarri hauetan ezarritako datei dagokienez, aurkezturiko obren kopurua espero baino handiago izatera, atzerapena izan liteke. Epaimahaiak ipuinak irakurtzeko eta aztertzeko aski denbora eduki dezan.
11. Sariak: Hiru Lehen Sari emango dira: bat, D ereduko Lehen Hezkuntzako arloan, beste bat, D ereduko Bigarren Hezkuntzakoan eta, hirugarrena, A ereduko arloan.
12. Pamiela Argitaletxearen liburu sorta bana emanen zaio kategoria bakoitzean irabazle gertatuko den mikro-ipuinaren egileari. Bestalde, epaimahaiak erabakiko du, kontuan hartuz ipuin irabazleen orijinaltasuna eta kalitatea, zein ikastetxetan eginen den ikasle, irakasle eta artista gonbidatuarekin ospatu ohi den sari banaketaren ekitaldia. Aurtengo edizioan artista gonbidatua Berri Txarrak taldeko Gorka Urbizu da.
13. Epaimahaiak egoki iritzitako aipamenak eman ditzake.
14. Sariak eman gabe gera daitezke, baldin eta, epaimahaiaren irizpidearen arabera, idazlanek behar bezalako merezimendurik ez badute. Era berean, epaimahaiak ahalmena izango du sor litekeen bere eskumeneko edozein arazo erabakitzeko, arazo hori oinarrietan aurreikusia ez bada.
15. Aurkezturiko idazlanak EKEren esku geratuko dira. EKEk bere webgunean edo beste komunikabide edo euskarritan argitaratu ahal izango ditu, egilea eta eskola aipatuz betiere.
16. Lehiaketa honetan parte-hartzeak arau hauek eta epaimahaiaren erabakia erabat onartzea dakar berekin.
Iruñea, 2011/09/15