DBH-n, Unai Ayerra gailendu da eta A ereduko ikasleen sailean Agustin Garrido izan da irabazle
Berriozarko Mendialdea Ikastetxeko Itxaso Aldaz izan da Mikro-ipuin lehiaketaren VI. edizioaren irabazlea, Kilimak izeneko lanaren eskutik. Euskara Kultur Elkargoak eta Pamiela argitaletxeak elkarlanean antolatzen duten lehiaketa honetako Derrigorrezko Bigarren Hezkuntzako saileko irabazlea, Iruñeko Biurdana Institutuko Unai Ayerra Perezen Mezua mikro-ipuina izan da. Aurtengoan, lehenengo aldiz, A ereduko ikasleak biltzen dituen sail berezi bat ireki da, non Marcillako Agustin Garridoren Beldurra ipuina nagusitu den.
Aldazen lanari dagokionez, Aingeru Epaltza (idazlea), Inma Errea (idazle eta itzultzailea); Angel Erro (idazlea) eta Toño Murok (irakasle eta ikertzailea) osatutako epaimahaiak zer aitortu du: "tonu malenkoniatsuari azken esaldian umorearen puntua gehitu dio os mikro-ipuin orekatua sortuz". D ereduko Lehen Hezkuntzako ikasleen lanak biltzen dituen lehen sail honetan, epaileek bestelako aipamen bereziak egin nahi izan dituzte, Igantziko eskolako Eva Descalzoren Zakurren istorioa, Arantzako herri eskolako Noelia Almandozen Hostoaren bizia eta Etxarri Aranazko Andra Mari Ikastolako Amets Artieda Diezen Nire etxe ondoko zarata nabarmenduz.
Derrigorrezko Bigarren Hezkuntzako saileko Mezua ipuin irabazlearen inguruan, epaimahaikoek aforismoekiko eta poesiarekiko loturak goraipatu dituzte, "esanaren zehatza, neurtua eta iradokizunez betea" azpimarratuz. Ohorezko aipamenen merezidunak, Berako Toki Ona institutuko Ramuntxo Albisturren Tiro bat ustekabean, Iruñeko Biurdana Institutuko Jon Corresen Bakoitzak bere lana dauka eta Otsagabiako Mario Sarioren Edaria izan dira.
Aurten, A ereduko (gaztelaniazko ikasketak euskara ikasgai bezala edukita) ikasleen lanak biltzen dituen sail berri bat ireki da, "iazko gomendioari jarraiki", zeinetan Lehen Hezkuntzako nahiz Bigarren Hezkuntzako lanak bildu diren. Bertan, Marcillako Marques de Villena institutuko Agustin Garridoren Beldurra mikro-ipuina izan da garaile, "irakurketa bat baino gehiago onartzen duen ipuina, amaiera ustekabeko eta pentsarazle baterako baliabideen zehaztasun aipagarria darabilena", epaileen iritziz.
Sail berri honetan bestelako lan batzuk ere nabarmendu nahi izan dira: Caparrosoko institutuko Oihane Carreraren Gizon indartsua, Lodosako Pablo Sarasate institutuko Andrea Brotacen Bilaketa eta institutu berdin horretako Sergio Misisen Maltratuaren kolorea.
Datorren urtera begira, sail honen baitan LH eta DBH-ren arteko bereizketa egitea aurreikusi da.
Epaimahaiko kideak "oso kontent" agertu dira Mikro-ipuin lehiaketaren VI. edizio honen parte hartze mailarekin eta, batez ere, aurkeztutako lanen kalitatearekin: "mikro-ipuinen azpigeneroaren ezaugarri berezien ezagutza hedatzen ari delako irudipena daukagu". Denetara, 1.378 ipuin bildu dira lehiaketan, iaz baino 300 inguru gutxiago. Hala ere, honen arrazoia irakasleek lanak bidali aurretik egiten duten aukeraketan errotzen da, izan ere, aurten 15 ikastetxe gehiago aurkeztu baitira (68 denetara).
Ipuin irabazleak nahiz aipamen berezia lortu duten lanak mikro-liburu batean bilduko dira, Iruñeko liburu azokan aurkeztuko dena. Sari banaketari dagokionez, horretarako data oraindik ezarri ez den arren, sariak banatzeko arduraduna Berri Txarrak taldeko abeslari den Gorka Urbizu izango dela ziurtatu da.
Miren Mindegia. Noticias de Navarra (2012-02-16)
