Irlanda da Erlea kultur aldizkariaren bigarren zenbakiko gai nagusia
Saint Patrick egunean, martxoaren 17an, Irlandako festa nazionalean aurkeztu da Erlea aldizkariaren bigarren zenbakia, Euskaltzaindiaren egoitzan. Aldizkaria Euskaltzaindiak argitaratzen du, eta Bernardo Atxaga idazle eta euskaltzain osoa da zuzendaria. Pamiela argitaletxea arduratzen da edizioaz eta diseinuaz. Aurkezpena Andres Urrutia euskaltzainburuak eta Bernardo Atxagak egin dute.
Aldizkariaren bigarren zenbakiak "bidaia bat" proposatzen du, Andres Urrutiaren esanetan, "Euskal Herritik Irlandara, baina baita Irlandatik Euskal Herrira ere".
Bernardo Atxaga "pozik" agertu da emaitzarekin. Batetik, Irlandari buruzko atala ikusita, "oso interesgarria" deritzo –besteak beste, Seamus Heaneyren testu batzuk ageri dira, Paddy Woodworthenak, baita Patxi Ezkiagaren itzulpenak edota Txomin Artola eta Jose Angel Irigarairen testuak ere–, eta bestetik, aldizkariaren atalak finkatzen ari direlako, jende askoren konplizitatearekin gainera.
"Jendea laguntzen ari da, eta nik idazle guztiekin hitz egingo dut, denei idatziko diet, ahots desberdinak interesatzen zaizkidalako niri. Ahotsak nahi ditut, ez dut nahi korurik", adierazi du.
Aipatutakoekin batera, Koldo Izagirrek, Aurelia Arkotxak, Xabier Montoiak, Joxean Agirrek, Felix Ibargutxik, Victor Monterok edota Harkaitz Kanok parte hartzen dute zenbaki honetan. Juanjo Zearreta Euskaltzaindiko kudeatzailearen eta Joxemiel Bidador idazlearen omenezko artikulu bi daude Erlean, baita Zaldieroaren komikia eta Jose Luis Zumetaren lana –aldizkariaren azala eta Marino Lejarretaren erretratua– ere.
