Ixiar Rozas idazleak Negutegia eleberriaren gaineko hitzaldia emango du Torinoko Nazioarteko Liburu Azokan. Fira-ren 22. edizioa maiatzaren 14tik 18ra burutuko da, eta aurtengoan Umberto Ecok emango du inaugurazio hitzaldia. Beste askoren artean, Björn Larsson, Salman Rushdie, Yu Hue, Orhan Pamuk, Adonis eta Alberto Manguel idazleak izango dira aurten Liburu Azoka entzutetsuan. Ixiar Rozasek maiatzaren 15ean emango du hitzaldia Lingua madre (ama hizkuntza) izeneko atalaren barruan.
Negutegia eleberriak Mexikon jarraituko du aurten bere nazioarteko ibilbidea, izan ere bertako Itaca argitaletxeak gaztelerazko itzulpena kaleratuko baitu datozen hilabeteotan.
Negutegia italieraz kaleratu zuen iaz Erromako Le Nubi argitaletxeak. Negutegia da euskaratik italierara itzulia izan den emakume baten lehenengo eleberria. Roberta Gozzi arduratu zen itzulpen lanaz eta liburuaren azala, berriz, Concetta Probanza marrazkilariarena da. Le Nubi argitaletxeak literatura eta saiakera argitaratzen ditu, besteak beste, Joseph Conrad, Arthur Cravan, José Cardoso Pirés, Jaques Rigaut edo Santiago López Petit.
“Negutegia-ren munduan ez dago zentrorik, ezta lerro zuzenik edo ibilbide pribilegiodunik ere. Iristeak abiatzea esan nahi du, behin eta berriro abiatzea, elkarrekin ibiltzen sustraiak errotuz. Makurtzen ez den ekintza itxaropentsua”, idatzi du Maria Nadotti itzultzaile eta idazle italiarrak Negutegia-ri buruz.
Informazio osagarria:
http://www.fieralibro.it/
http://www.fieralibro.it/it/fiera/lingua-madre.html
http://www.fieralibro.it/it/organizza-la-visita/programma/details/371-Dalla%20Spagna-%20Ixiar%20Rozas.html
